O colectivo Cinema Sticado


 

Cinema Sticado: un colectivo multidisciplinar de artistas que fai espectáculos de teatro visual e cine ao vivo.

 

Que queremos ademáis de divertirnos ?

Temos aspiración por crear imaxes cargadas de beleza, poesía e simbolismo e unha incuestionable vocación polo artesanal, mais tamén andamos á procura de novas narrativas, novas linguaxes, novas expresións que poidan liberar a percepción de formas preconcibidas e que contribúan así dalgún xeito na formación dunha visión crítica da realidade.

Nesta procura de estimular a imaxinación da audiencia e inspirarlles a reflexión, o que plantexamos é un paradóxico doble espectáculo: por unha banda, dotamos dunha función presencial e evidente aos elementos da representación en vivo (actores, decorados, personaxes, sons, imaxen e tecnoloxía), e pola outra, pretendemos manter o fío dunha ficción da que o público -aínda consciente de cómo se está xestando- non poida sustraerse.

 

Que facemos ademáis de divertirnos ?

Arte. Facemos arte. Combinamos artes visuais, teatrais e performativas coa creación de audio e video en tempo real (ollo, non empregamos material pregravado!). Usamos cámaras e micrófonos e facemos toda a edición nós mesmos controlando cos nosos móbiles dous programas informáticos feitos con software libre (maioritariamente pure data, o programa de vídeo o fixemos nós).  E, ao fin, facemos películas en directo sen esconder como o facemos e buscando proporcionar ao espectador unha experiencia única e asombrosa.

 

Desde cando ?

Presentamos o noso primeiro traballo “STRPTS // episodio 1: Mirlo & Rula” en 2015 despois de máis de dous anos de experimentación e desenvolvemento nun taller clandestino situado nun lugar indeterminado da paradisíaca península do Morrazo, en Galicia, España. 

En 2017 fixemos un espectáculo coa Orquesta Clásica de Vigo (60 músicos) que titulamos “VÉRTIXE // BSO& filme en directo“, unha proposta de representación única en torno á película de Hitchcock. Foi unha experiencia alucinante.

Co primeiro espectáculo xiramos por distintas prazas e Festivais de Galicia, España, Portugal, Suiza, Bulgaria e Polonia, e seguimos xirando.

En outono de 2018 presentamos o noso segundo traballo “STRPTS // Fin de tempada“, que foi seleccionado pola Red de Teatros Alternativos de España en 2019.

En 2020 estreamos o noso último espectáculo: “PYKA: o corazón na eclipse”.

 

Quen somos ?

O núcleo do colectivo está composto polos dous que firman estas liñas:

    • Xosel Díezenxeñeiro, artista e profesor, creador e cerebro do plan, manipulado durante os espectáculos, realizador en vivo das películas e constructor da escenografía, das luces e do sofware de video baixo os pseudónimos de Man Núñez, Nola Rivera e Joao Pinheiro (que se lle vai facer, hai que deixalo).
    • Helena Varelaactora, actriz e o que faga falta, creadora e mestra das voces, entre elas a da consciencia (e da conciencia), manipulada durante as representacións, facedora da ambientación sonora e distribuidora (alguén ten que facelo).

Tamén son parte do colectivo, aínda que eles non o saben, os queridos artistas (que tamén amigos) que colaboran ou colaboraron con nós nos procesos creativos dos nosos espectáculos, e aos que desde aquí damos as grazas, ben contentos, ben orgullosos:

    • Xabier Varela, virtuoso e sublime pintor, debuxou e deu cor aos magnéticos personaxes da serie STRPTS escapándoselle nalgún caso algunha similitude cos nosos caretos. Tamén é o autor das cabezas dos títeres de PYKA.  (visita aquí a súa web)
    • Julio Fer, maldito e excelente dramaturgo, atopou as letras exactas (ou non) para as voces dos protagonistas das nosas historias e foi quen de crear as conexións necesarias entre as realidades e as ficcións todas que hai nelas. (visita aquí a súa web)
    • Trío Caspervek, espectacular e exquisito trío de músicos cos que empezamos a colaborar en PYKA. Eles son Brais González (compositor e piano), Blas Castañer (percusión) e Raquel Fernández (violín).  (visita aquí a súa web)
    • Noemi Rodríguez, xenial e superlativa actriz e directora de escena, asesorounos dramatúrxicamente en “Fin de tempada”. Ben lle valeu algún quebradeiro de cabeza. (visita aquí a súa web)

 

PREMIOS

2017: “Innovative approach to puppetry animation” no Festival Animart- III International Animation Art Festival  (Łodz – POLONIA) 

2021: “Technological inovations in the development of a new language” no Festival XXVI International Puppet Theatre Festival “Three are too many, two are not enough” (Plovdiv – BULGARIA)

 

FESTIVAIS

Feria internacional del títere de Sevilla (Sevilla)

Festival TítereMurcia (Murcia)

Mostra Internacional de Teatro cómico e festivo de Cangas (Cangas)

Festival Fóra do Mapa Ferrol (Ferrol) 

International Puppet-Theatre Festival “Three are too many, two-not enough” (Plovdiv – BULGARIA) 

Figura TheaterFestival (Baden – SUIZA) 

Festival Animart- III International Animation Art Festival  (Łodz – POLONIA)

Festival Internacional de Teatro- ITF- Valise (Łomza – POLONIA)

Almería Creative Commons Film Festival  (Almería)

Feira de Teatro de Bonecos e Formas Animadas (Fafe – PORTUGAL)

Festival Primavera do Cine (Vigo)

Festival Internacional de Títeres de Redondela (Redondela)

FIOT de Carballo (Carballo)

Festival Cinemas Ocultos (Cangas)

Festival Titirideza (Lalín)

Festival ALT de Vigo (Vigo)

 


AÍNDA NON TE FAS UNHA IDEA?

Olla aquí un video-ensaio sobre nós e o noso traballo